ବେଙ୍ଗାଲୁରୁ : ଭାରତର ଆଇଟି ଉଦ୍ୟୋଗରେ ସବୁଠାରୁ ଅଧିକ ଦରମା ପାଉଥିବା ମୁଖ୍ୟ କାର୍ଯ୍ୟନିର୍ବାହୀ ବା ସିଇଓ କିଏ ? ଏହାର ଉତ୍ତର ହେବ ସଫ୍ଟଓ୍ବାର କମ୍ପାନି ଓ୍ବିପ୍ରୋର ସିଇଓ ତଥା ଏମଡି ଥଏରି ଡେଲାପୋର୍ଟ । ୨୦୨୧-୨୨ରେ ବାର୍ଷିକ ଦରମା, ଭତ୍ତା ଓ କମିଶନ ବାବଦରେ ସେ ପ୍ରାୟ ୧୦.୫ ନିୟୁତ ଡଲାର ବା ୭୯.୬୬ କୋଟି ଟଙ୍କା ନେଇଥିଲେ ।
ଦରମା ପରିମାଣ ଦୃଷ୍ଟିରୁ ତାଙ୍କ ତଳକୁ ରହିଛନ୍ତି ଇନଫୋସିସ ସିଇଓ ସଲିଲ ପାରେଖ, ଯିଏକି ୨୦୨୧-୨୨ରେ ୭୧ କୋଟି ଟଙ୍କାର ଦରମା ଓ ଅନ୍ୟନ୍ୟ ପାଉଣା ନେଇଛନ୍ତି । ତେବେ ବିଶ୍ବର ସବୁଠାରୁ ଅଧିକ ଦରମା ନେଉଥିବା ଆଇଟି କମ୍ପାନି ସିଇଓ ହେଲେ ଆକସେନଚର ସିଇଓ ଜୁଲି ସ୍ବିଟ୍ । ତାଙ୍କ ବାର୍ଷକ ଦରମା ହେଉଛି ୨୩ ନିୟୁତ ଡଲାର ବା ପ୍ରାୟ ୧୭୯ କୋଟି ଟଙ୍କା ।
ନିକଟରେ ଓ୍ବିପ୍ରୋ ପକ୍ଷରୁ ୟୁଏସ୍ ସିକ୍ୟୁରିଟିଜ୍ ଏଣ୍ଡ ଏକ୍ସଚେଞ୍ଜ କମିଶନରେ ଦାଖଲ ତଥ୍ୟରୁ ଏକଥା ଜଣାପଡ଼ିଛି । ଏଥିରେ କୁହାଯାଇଛି ଯେ ୨୦୨୧-୨୨ରେ ସେ ଦରମା ଓ ଭତ୍ତା ବାବଦରେ ୧.୭ ନିୟୁତ ଡଲାର, ୨.୫ ନିୟୁତ ଡଲାରର କମିଶନ, ସୁବିଧା ସୁଯୋଗ ବାବଦରେ ୨ନିୟୁତ ଡଲାର ଓ ଅନ୍ୟାନ୍ୟ ହିସାବରେ ସେ ୪ ନିୟୁତ ଡଲାର ନେଇଥିଲେ । ତେବେ ‘ଅନ୍ୟାନ୍ୟ’ କେଉଁ କେଉଁ ବାବଦ ଖର୍ଚ୍ଚକୁ ବୁଝାଉଛି, ସେ ସମ୍ପର୍କରେ କମ୍ପାନି ପକ୍ଷରୁ କିଛି ସ୍ପଷ୍ଟ କରାଯାଇନାହିଁ । ତେବେ ଏହା ମଧ୍ୟରେ ଏକ ନଗଦ ଅର୍ଥ ପାରିତୋଷିକ ଥିବା କୁହାଯାଉଛି । ଜୁଲାଇ ୨୦୨୦ରେ ଓ୍ବିପ୍ରୋରେ ସିଇଓ ଭାବେ ଯୋଗ ଦେଇଥିବା ବେଲାପୋର୍ଟ ଜୁଲାଇ ୨୦୨୦ରୁ ମାର୍ଚ୍ଚ ୨୦୨୧ ମଧ୍ୟରେ ପ୍ରାୟ ୮.୮ ନିୟୁତ ଡଲାର ବା ୬୪ କୋଟି ଟଙ୍କାର ପାଉଣା ନେଇଥିଲେ ।